Nou goumé grif an tè
Nou lité fal an fal
Nou goumé-lité pou vansé fè douvan
Nou tonbé asi kan bwèy flangé gran ouvè
Nou tribiché an dépant a ravin wòs
Nou pran kanpo men anba machwa
Nou lésé tan séché koulé plen dlo pléré
Nou mandé lavi soukou
Mé pou nou lavi soud
Nou ka woulé pou nou rivé
Mé nou ka échwé an kalmi-pla
Nou ka lofé
      Nou ka godiyé
             Nou ka vansé san sanntè
Yo di nou chivé grenné pa chivé
Yo di nou moun a né-plat ka toufé lannuit
Yo di nou kaka-moulen pa bèl koulè
Nou lonji chivé èvè lakòl bon maché an lankan
Nou dòmi si do èstenké anba sòlèy-midi
Nou mandé mabouya bokanté po pou blanchi mizè
Malgré tousa mi nou kant é kant èvè nou menm

Nou fè séyans panan lanjélis
Nou kouri kèlè an lanmè-kwazé
Nou mété lenj alanvè an bon doukou
Pou nou vwè douvan nou…

Kanmarad sé mak-san-la
                     Ou ka vwè-la
                    Atè-la menm-la
Sé chimen an maké pou van lésé tras lè jou an nou ké rivé
Pas an sèten nou ké ni jou an nou ki tan nou an péyi an nou
Apa kous nou ka kouri pou gannyé koutyanm si do a maléré
Sé on sèl gran konvwa ka sanblé pou lévé on vayan gawoulé
Ki ké fann syèl é montré chimen a libèté an nou
Astè an péyi Gwadloup
Nou ké lévé tèt jiktan solèy pèd fé
Pas nou pa ni dwa koulé

Durocher 15 mars 2024
Max Rippon

*

Viré monté