Potomitan

Site de promotion des cultures et des langues créoles
Annou voyé kreyòl douvan douvan

Toutwèl épi foumi

Jean de La Fontaine

trad. Hector Poullet

Zenaida aurita, tourterelle à queue carrée. Photo Francesca Palli

Marbot pa té chwazi mété Fab-lasa, "La Colombe et la Fourmi" an kréyol? Menm La Fontaine ékri-y apré Edmé Boursault té ja maké-y. Es ou konnèt dòt kréyolis ki fè-y. Kèlanswa ou pé voyé'y asi Montray Yo té konmandé-mwen on fab asi solidarité.

Toutwèl épi foumi

Bò rivyè Bèlo on toutwèl té ka bwè
Atoupannan on foumi i té la
vini tonbé an dlo-la. 
Asiré Foumi té konsidiré adan on gran lanmè
I pa té kay janmé rivé
déviré jis  atè.
Toutwèl té ni bonkyè
lamenm-la
I jété on tibranch hazyé an dlo-la
ora Foumi.
Pou Manzèl sété akwèdi on montangn.
Kanmenmsa I fini pa bakyé abò
é sé konsa i rivé chapé vi a-y.
Mé mi on Gyanpo tounipyé
ka pasé la
an menm tan-la.
Konmdifèt Misyé té ni on fizi.
Vwè i vwè zozyo-la
i di an kyè a-y :

— Woy ! An chanslé ! Gay sa tibwen

On dèkwa pou an pé sa
plen kannari an-mwen !
I té ja ka vizé toutwèl-la lè :

— Kranm !

Foumi-la mòdé-y an talon.
Tan pou Monkonpè touné tèt a-y
gadévwè ka i ka pasé
Zozyo an-nou la té ni tan
chapé kò a-y.
I pwan lavòl 

— Flap ! Flap! Flap !

Adyé vat !
Kannari a Gyanpo touvé-y vid onfwa-lamenm.
Ahak ki hak, ayen menm !
Nòstròm rèsté èstébékwè
bèkèkè
konkonm san grenn !

Transbòdé jòdi 15 juiyé 2018 pou prèmyé fwa
Dapré fab a La fontaine La colombe et la Fourmi.
Ektò.

boule  boule  boule

La Colombe et la Fourmi

Le long d'un clair ruisseau buvait une Colombe,
Quand sur l'eau se penchant une Fourmi y tombe.
Et dans cet océan l'on eût vu la Fourmi
S'efforcer, mais en vain, de regagner la rive.
La Colombe aussitôt usa de charité :
Un brin d'herbe dans l'eau par elle étant jeté,
Ce fut un promontoire où la Fourmi arrive.
Elle se sauve ; et là-dessus
Passe un certain Croquant qui marchait les pieds nus.
Ce Croquant, par hasard, avait une arbalète.
Dès qu'il voit l'Oiseau de Vénus
Il le croit en son pot, et déjà lui fait fête.
Tandis qu'à le tuer mon Villageois s'apprête,
La Fourmi le pique au talon.
Le Vilain retourne la tête :
La Colombe l'entend, part, et tire de long.
Le soupé du Croquant avec elle s'envole :
Point de Pigeon pour une obole.

boule

Viré monté